Qaraqalpaqstan sportshıları – joqarı nátiyjelerge qaray: jaslarımızdan 66 medal!

Tashkent qalasında ótkerilgen II Prezident olimpiadası sport jarısları óz juwmaǵına jetti. 12 kún dawamında mámleketimizdiń barlıq aymaqlarınan 3 657 jas atlet 26 sport túri boyınsha jeńimpazlıq ushın bellesti.

"Olimpiya qalashası"nda jarıslardıń juwmaǵına baǵıshlanǵan saltanatlı jabılıw máresimi bolıp ótti. Onda jarıs dawamında joqarı nátiyjelerge erisken sportshılar hám múnásip qatnasqan aymaqlar sıylıqlandı.

Quwanıshlı tárepi, Qaraqalpaqstan Respublikası da sport túrleriniń geografiyasın keńeytiwge qosıp atırǵan úlesi ushın ayrıqsha atap ótildi. Bul nátiyje tiykarında aymaqta sporttı ǵalaba en jaydırıw, onıń túrli baǵdarların tek ǵana qala hám rayon oraylarında emes, al eń shetki awıllarǵa shekem jetkeriw baǵdarında ámelge asırılıp atırǵan jumıslar jámlengen. Nátiyjede jaslar ushın sport penen shuǵıllanıw imkaniyatları keńeyip, jańa talantlar ashılmaqta.

Sonday-aq, olimpiadada Qaraqalpaqstan Respublikası sportshıları 16 altın, 24 gúmis hám 26 bronza medalın qolǵa kirgizip, ulıwma komandalıq esapta 6-orındı iyeledi.

Ótken jılı 14-orındı iyelegen Qaraqalpaqstan komandası bıyıl 6-orınǵa kóterilip, nátiyjesin sezilerli dárejede jaqsıladı.

Bul – húrmetli Prezidentimizdiń ayrıqsha itibarı menen jas sportshılarımızdıń umtılısı, trenerlerimizdiń pidákerlik miyneti hám sporttı rawajlandırıw baǵdarında ámelge asırılıp atırǵan jumıslardıń nátiyjesi bolıp esaplanadı.